பட்டினப்பாலை – சிறப்புப் பாயிரம்

பொய்யாக் காவிரிப் புகுவாய் நின்று

எய்ப்புநீக் குறந்தை யொய்யெனச் சேர,

தையலாள் இழையொழிய, தனியிருத்தித் தான்

வெய்கானம் கடக்க விழையா அறிவன்,

மெய்யுரை சொன்ன கடியலூர்க் கண்ணன்,      - 5

வற்றா நீரும், வளநாட்டுச் சிறப்பும்,

பட்டினப் பெருமையும், பகல்விளை யாட்டும்,

கட்டாண் மாக்கள் களரியில் பொருதலும்,

நட்டணை யிலார் நள்ளிரவுத் துஞ்சலும்,

கொட்டகா ரத்து ஏற்றமும் இறக்கமும்,          -10

செவ்வேள் வெறியாடுஞ் சீர்மிகுந் தெருக்களும்,

வெவ்வேறு வணிகர்தம் வெளிப்படு கொடிகளும்,

வெவ்வினை பயிலா வேளாண் வாழ்க்கையும்,

அவ்வழி நின்றநல் லறவணிக நேர்மையும்,

செவ்வனம் பன்மொழி செப்பு மொக்கலும்,       -15

அண்டர்க் கொடுஞ்சிறை வண்மதி லேறி,

பண்டுடைத் தாயம் பழுதின்றிப் பெற்று,

முண்டுபகை வேந்தர் முடிகீழ டக்கி,

பண்கெழு நாட்டின் பல்வளம் பெருக்கி,

எண்திசைப் பேரெழ எழுந்த மாவளவன்,         -20

கோயில் சிறப்பும், குடும்பம் நிறுத்தலும்,

வாயில், முற்றம், வயவர் காத்தலும்,

ஏயின் கேட்க ஏறுபோல் மன்னரும்,

காயல் சிறப்பும், கவினுறு பட்டினமும்,

தாயோ லையென வெழுதித் தந்தநல்           -25

பட்டினப் பாலை, படித்து வுணர்ந்து,

கொட்டிக் கிடக்கும் குடியுயர் வாழ்க்கை,

முட்டாச் சிறப்பின் முன்னோர் வணிகம்,

தட்டாச் செய்யுள், தண்டமிழ் யாப்பு,

அட்டியின் சுவையென் றருந்திச் சுவைப்பீரே.   -30

(நிலைமண்டில ஆசிரியப்பா)

28-06-2020