Monday, 17 January 2022

நானும் கேக்குறேன்


 

இரவு மணி ஒன்பது.

அம்மாவிடம் தொலைபேசியில் பேசிமுடித்தவுடன் இதை எழுதத் தொடங்குகிறேன்.

அம்மா திருமணமாகி வந்து அறுபதாண்டுகள் ஆகிறது. அப்பா 2018 ல் மறைந்த பின் மெல்ல மெல்ல நினைவுகளுக்குள் வாழத் தொடங்கினார் அம்மா. தன் தாய்வழி தந்தைவழி சொந்தங்கள் பலரது வாழ்வோடு மிகுதியாகக் கலந்துறாவாட இயலாத வாழ்க்கை முறையிலிருந்து வெளிவந்த போது, அவர்களில் பெரும்பாலானோர் மறைந்துவிட்டிருந்தார்கள். இது அம்மாவின் வயதொத்த பெண்களில் பெரும்பாலானோருக்கு நிகழ்ந்த துயரம் தான்.

நேற்று அம்மாவின் உறவில் ஒரு இணையர் மரணம். ஊரில் ஒரு பெண்மணி மரணம். இரண்டுமே அம்மாவை நிறைய பாதித்திருப்பதாக உணர்கிறேன். 

முதலாவது மிகுதியாகக் கலந்துறவாடியிராத உறவு. இயலாமையில் எழுந்த துக்கம்.

இரண்டாவது... அப்பாவின் நண்பரின் துணைவியார். 

அப்பா ஏற்பாடு செய்து நின்று நடத்திய திருமணங்களில் முகாமையானவை அவரது நண்பர்களுக்குச் செய்துவைத்த திருமணங்கள். வேட்டி சேலை வாங்குவது தொடங்கி அவர்கள் மணம் முடித்து வாழ்வதற்குத் துணைசெய்யும் மாடு கன்று வரை ஏற்பாடு செய்து, பாட்டத்திற்கு வயல்களையும் ஏற்பாடு செய்து, அப்பா வாழ்ந்த வாழ்க்கையின் தடங்களாய் அம்மா பார்த்துக் கொண்டிருந்த, அம்மாவிலும் இளையவர்கள்  ஒவ்வொருவராய் மறைந்து கொண்டிருக்கிறார்கள். 

"அம்மா.. நாந்தான் பேசுறேன்... படுத்திட்டியா?"

"இல்ல மக்கா.. சாப்பிட்டுட்டு ஒம்போது மணி வரைக்கும் இங்ஙன இருப்பேன். அப்புறம் போயி படுப்பேன். ஆனாலும் உடனே உறக்கம் வராது. ஒவ்வொண்ணையா நெனச்சுகிட்டு கெடப்பேன்..." 

அம்மா மெல்ல நினைவுகளுக்குள் நடக்கிறாள். கொஞ்சம் திருப்புவோம் என்ற எண்ணத்தில்... "வேற என்ன விசேசம்மா"

"ம்.. என்ன விசேசம். கோசண்னனுக்கு பொண்டாட்டி செத்துபோனா. ஒனக்குத் தெரியுமா?"

"ஆமா நேத்தே கோசுபாட்டாக்கு மூத்த மகன் போட்டிருந்தான்"

"போன்ல போட்டிருந்தானா?"

"ஆமாம்மா. நல்லாதான் இருந்தா அந்த ஆச்சி.. என்ன திடீர்னு?"

"சாய்ங்காலம் ஆத்துல போயி குளிச்சிட்டு வீட்டுக்கு வந்து துணி மாத்திருக்கா. என்னவோ செய்யுதுன்னு சொல்லிட்டு கட்டில்ல படுத்திருக்கா. ஒடனே ஆசுத்திரிக்கு கொண்டுபோயிருக்காங்க. போற வழிலேயே முடிஞ்சிருச்சு."

"ம்.."

"நான் கல்யாணம் கழிஞ்சு வந்த பொறவுதான், கோசண்ணன் கல்யாணம். அப்பாதான் கூடமாட எல்லாம் செய்தா. நல்ல உழைப்பாளி அவ. மாட்டையெல்லாம் அப்படி பாத்துக்குவா."

"அப்படியா?"

"ஆமா. அவ்வொளுக்கும் பால் மாடெல்லாம் உண்டு. பால் யாவாரமும் உண்டு. நம்ம நடய கடந்து போற சமயத்துல எல்லாம் நின்னு பாடு பேசிக்கிட்டுதான் போவா "

மேலே கண்ட உரையாடல்களில் பெரும் பகுதி ஏற்கனவே பலமுறை நிகழ்ந்ததுதான். ஆனாலும் முதன்முறை போலக் கேட்டுக்கொண்டும் வினாவெழுப்பிக்கொண்டும் இருக்கிறேன். 

 "ம்.. நல்ல சாக்காலம் அந்த ஆச்சிக்கு"

"நானும் கேக்குறேன் எனக்கு வரமாட்டேங்குதே" என்றார் அம்மா பட்டென்று. 

பொட்டில் அறைந்தது போல் இருந்தது எனக்கு. நான் அப்படிச் சொல்லியிருக்கக் கூடாதோ?  நகைச்சுவையும் மனவுறுதியும் மிகுந்தவள் அம்மா. பேச்சில் முக்கால் பகுதி சிரிப்புகளாகவே கடக்கும். அத்தனை எளிதாகக் கலங்கிவிடுபவள் இல்லை. அந்த நினைப்பிலேயே நான் பேசிக்கொண்டிருந்திருக்கிறேன். முதுமையும், நட்புகள், உறவுகள்  மறைவும் உறங்காத இரவுகளில் அவளோடு பேசுவதை அவள் மட்டுமே அறிந்திருப்பாள். அதன் தாக்கம் இப்படியாக அவளை மாற்றியிருக்கிறது.

"கேட்ட உடன கிடைக்கிறதுக்கு அது என்ன கடைல விக்கிற சாமானமா, அதுவா தானம்மா வரணும்..."

"ம்.. அதான் பலவாக்குல யோசிச்சிட்டே படுத்து கெடப்பேன். எப்ப உறக்கம் வரும்னு தெரியாது. சரி நீயும் போய் சாப்பிடு. நான் படுக்கிறேன்."

"சரிம்மா... அப்ப வச்சிரட்டா?"

"சரி. கூப்பிடு என்னா?"

"சரிம்மா..."

இன்றிரவு நிம்மதியாக உறங்கியிருப்பாளா? இல்லை சிந்தனை வலுத்திருக்குமா?

Thursday, 13 January 2022

பொங்கல் வாழ்த்து 2022

 

கவின்மிகு வானமலை
வடிநவில் அம்பு சொல்ல
கார்த்திகையில் பிறந்த மகள்,
குழிசி நிறை தினைப் பொன்கம்
குரவையிட ஆவணியானாள்.

மலையிறங்கி மருதம் வந்து
நெல்லுகுத்துப் படையலிடும்
மாமன்னர் காலமதில் தைமகளானாள்.
சிலகாலம் சென்றபின்னே
மாற்றரசில் சித்திரையானாள்.

கருமிளகு காண வந்து
வானமலை தானடைந்த
வணிகத்தின் அரசுயர சனவரியானாள்.

பெரியோரை வியத்தலில்லை;
சிறியோரை இகழ்தலுமில்லை.
பாட்டன் சொன்ன வழி
பழகிவரும் தமிழர் கூட்டம்,

காய் பலவும் அகழ் கிழங்கும்
கரும்பும் வெண்சோறும்
கன்னலும் பிரப்பும் பசுமஞ்சளொடு
படையலிட்டுத் தொழுதேத்தும்
நன்னாளாம் இன்னாளில்,

புத்தாண்டு என விழைவோர்
பூரிக்க ஒரு வாழ்த்து!
தமிழர் திருநாள் என மகிழ்வோர்
தகைமைக்கும் ஒரு வாழ்த்து!
வயலறியா நிலையிருந்தும்,
வானவனை வணங்கும் நாளென்போர்
உளம் மகிழ ஒரு வாழ்த்து!
தெற்கிருந்து வடக்கேகும் திருநாள் 

என்று சிறப்பிக்கும்
நன்மகர்க்கும் ஒரு வாழ்த்து!

வாழ்த்தென்ன விலையீந்து
வாங்கும் பொருளா?
உளம் மகிழ உள்ளிருந்து
வருஞ் சொல் தானே!

பொலி நிறைய, மனம் நிறைந்து,
மடி நிறைய நெல் சொரியும்
உழவர் கைபோல்,
உங்கள் அகம் நிறைய
தமிழ்கொண்டு வாழ்த்திடுவேன்.

குலம் செழிக்க வளம் கொழிக்க
நீவிர் வாழ்க!
குரவை இசை ஒலிக்க
பொங்கட்டும் தைப்பொங்கல்.
பொங்கலோ பொங்கல்.

==============================

திருச்சிராப்பள்ளி ப.மாதேவன்

13-01-2022

=============================

Wednesday, 12 January 2022

திருமுன் தமிழ் - தாழைப்பத்து 5

 

கருவறையும் மண்டபமும் இணையும் இடம்.    இடது: செழியன் சேந்தன், வலது: வீரகேரளன்

பாடல் 5: வீரகேரளன் திருப்பணி விளக்கம்

சேந்தன் கட்டிய பெருவாயில் கொண்ட கருவறையும் முன்பக்கம் நின்று தொழும்படியான திறந்த சிறு மண்டபமும் கொண்டு நின்றிருந்தது சேந்தநாதன் கோயில்.

ஐநூறு ஆண்டுகளுக்குப் பின்  கிபி 1125ல் மன்னன் வீரகேரளன் உயர்ந்த ஒரு மணிமண்டபமும், சிறப்பான ஒரு நாடகச்சாலையும் அமைத்தான். வெளிப்புறம் சிறந்த வேலைப்பாடுகளுடனும் உள்ளே தூண்களில் சிற்பங்களுடனும் காட்சியளிக்கிறது மணி மண்டபம். அதனுள்ளும், நாடகச்சாலையிலும் இசைக்கலைஞர், கூத்தர் சிற்பங்கள் உண்டு. காற்று நுழைந்து வெளியேற, வெளிச்சம் வர சிறப்பான பெரிய சாளர அமைப்பும் உண்டு. நாளும் சந்தனம் அரைத்துப் பூச உரைகல்லும் மேடையும் காணப்பெறுகிறது. திட்டமிட்டு வெகு சிறப்பாகக் கட்டப்பட்டது இந்த உயர்ந்த அகன்ற மண்டபம்.

 
பொருள் விளக்கம்:

முன்றில் - முற்றம்
அறநிலை - கோவில்
வரையறை - திட்டமிட்ட சிறப்பான அளவுகளில்

பாடல் :5 வீரகேரளன் திருப்பணி விளக்கம்

சிறுமுன் றிலொடு கருவறை கொண்ட/
அறநிலை கண்டும னக்குறை கொண்டு/
வரையறை செய்துயர் மண்டபந் தந்தான்/
பெருவீ ரகேரள னாம்./
 

Tuesday, 11 January 2022

திருமுன் தமிழ் - தாழைப்பத்து 4

 


பாடல் 4: இறைப் பெயர் விளக்கம்

சங்கரநயினார்கோவிலில் இருந்து 15 கி.மீ தொலைவில் உள்ள மலையடிக்குறிச்சியில் ஒரு குடைவரைக் கோவில் இருக்கிறது. அங்கே காணப்பெறும் கல்வெட்டு (கிபி 620 - 642) “மாறன் மகன் சேந்தன்” எனக் குறிப்பிடுகிறது.

நெல்லையப்பர் கோயில் கல்வெட்டொன்று “மலைமண்டலத்துத் தாழைக்குடி சேந்தபிரான்” என சேந்தன் கட்டிய இந்தக் கோயில் இறைவனின் பெயரைக் குறிப்பிடுகிறது.

புலவர் ஆர்.பத்மநாப்பிள்ளை அவர்கள் எழுதிய “தாழைக்குடிச் சரிதம்” எனும் நூலும் இந்தக் கோயில் இறைவனை “சேந்தனீசுவரமுடைய நயினார்” என்று குறிப்பிடுகிறது.

செழியன் சேந்தன் கட்டிய இந்தக் கோயில் இறைவன் “சேந்தளீசுவரமுடைய நயினார்” என்றே பண்டைய நாட்களில் அழைக்கப்பட்டிருக்கிறார். சேந்தன் என்ற பெயர் தாங்கியோரும் இவ்வூரில் உண்டு.

யானைப் படைகள் ஏராளம் கொண்டிருந்ததால் “சிலைதடக்கைக் கொலைக் களிற்றுச் செழியன்” என்ற சிறப்புப் பெயரும் சேந்தனுக்கு உண்டு. அதன் காரணமாகவே யானை நுழையும் அளவுகொண்ட கருவறை அமைத்தானோ? 

இங்கு நடைபெறும் திருவிழாவில் “யானை கழூஉப் போடுதலும் உண்டு.

 

சொற்பொருள்:

மலையடிச் சீரூர் - வாசுதேவநல்லூர் அருகில் உள்ள மலையடிக்குறிச்சி

குகைவரி - குடவரைக் கோயில் கல்வெட்டு

சிலைதடக்கை - சேந்தன் செழியனின் சிறப்புப் பெயர் முன்னொட்டு

மலைமண்டலம் - நாஞ்சில்நாடு

 

பாடல் 4 : பெயர் வரலாறு

 மலையடிச் சீரூர் குகைவரி சொல்லும்/

சிலைதடக் கைச்செ ழியன்பெ யரொடு/

மலைமண் டலசேந் தளீசுவ ரத்து/

உடையார் நயினாரா னார்./

 

மலையடிக்குறிச்சிக் கவெட்டு

 

Monday, 10 January 2022

திருமுன் தமிழ் - தாழைப்பத்து 3

 


பாடல் -3 விளக்கம்

கண் காது வாய் மூக்கு மெய்யென உருவ இழைப்பில்லாத இலிங்கவடிவை நிறுத்தி, தாழக்குடியில் புதிய கோயில் அமைத்தான் செழியன் சேந்தன். கி.பி. 625-640 க்குள் கட்டப்பட்ட இந்தக் கோயில் சிவனுக்காக மட்டுமே அமைக்கப் பெற்றது. சிவனுக்கு அருகில் அமரும் மலைமகளுக்குக் கோயில் கட்டப்படவில்லை. பிற்காலத்தில் (ஏறத்தாழ 600 ஆண்டுகளுக்குப் பின்னே அழகம்மைக்குக் கோயில் கட்டப்பெற்றது)

வழமையாகக் கோயில்களில் கருவறை வாயில் சிறியதாகவே இருக்கும். சில கோயில்களில் மட்டும் பெரியதாக இருக்கும். சேந்தன் எழுப்பிய இந்தக் கோயிலின் இன்னொரு சிறப்பு, இதன் கருவறை நடை யானை நுழைந்து வெளிவரும் அளவிற்குப் பெரியது. அது குறித்தச் சிற்பங்களும் கருவறை வெளிச்சுவரில் காணக்கிடைக்கின்றன. இரண்டாவது பாடல் குறிப்பிடும் “சித்திரைப் பத்துக் கதிரொளி நுழைவு” நிகழ்வுக்கு அடித்தளமிட்டதே இந்தப் பெருவாயில் நுணுக்கமாக இருக்கலாம்.

சேந்தனுக்குப் பிந்தைய மன்னரின் திருப்பணிகளும் இதையே தொடர்ந்ததால் இப்பொழுது கோயிலின் முன் நின்று பார்த்தால் கருவறை வரை பெருநடைகள் உயர்ந்து, மாபெரும் காட்சியாய் கண்முன்னே விரியும்.

 

சொற்பொருள்:

உருவறை   - செம்மையான உருவில்லாத

புத்தன்          - புதிய

அருகுறை   - அருகில் இருக்கின்ற

அம்மை       - மலைமகள்

பெருநடை  - பெரிய வாயில்

தளி               - கோயில்

 

பாடல் : இன்னிசை வெண்பா

 

உருவறை ஈசர் உறைந்திட  புத்தன்/

கருவறை கட்டினான் சேந்தன் செழியன்/

அருகுறை அம்மைக் கிடம ளியாது/

பெருநடை கொள்த ளியே/

 


 

Sunday, 9 January 2022

திருமுன் தமிழ் - தாழைப்பத்து 2

 


பாடல் - 2 விளக்கம்

நாஞ்சி நாட்டின் சிறப்புகளில் முகாமையானது மழை. இரண்டு பருவ மழைக் காலங்களிலும் மழைபெறும் நிலம் அது. “சித்திரைப் பத்தாம் உதயம்” வேளாண்மைக்கு உகந்த நாள். அன்றே பொன்னேர் பூட்டல் நடக்கும். நாஞ்சிநாட்டு வடமீதி மக்களுக்கு இந்நாள் குறித்த செய்தி தவறாது தெரிவிக்கப்படவேன்டும் என பண்டைய மன்னர்கள் எண்ணினார்கள். காரணம், அன்றிலிருந்து மழைப்பொழிவு தொடங்கும். உழுது, மரமடித்து, பொடியுணக்கி விதைக்க, விளைச்சல் சிறக்கும்.
 
நாஞ்சிநாடு பண்டைய பகுப்புமுறையில் பன்னிரெண்டு பிடாகைகளாகப் பகுக்கப்பட்டிருந்தது. ஒவ்வொரு பிடாகையும் தனியாக இயங்கும் நிர்வாக அமைப்பு முறையைக் கொண்டவை. ஒரு பிடாகையில் பல சிற்றூர்கள் இணைக்கப்பட்டிருக்கும். இவையே வேளாண்மைக்கான நீர்ப்பங்கீடு, குளங்கள் பராமரிப்பு போன்றவற்றைக் கையாண்டன. அப்படியான பிடாகைகளில் “தாழக்குடிப் பிடாகையும்” ஒன்று. அதனால் இங்கே கட்டப்பட்ட கோயில் பண்டை நாட்களில் முக்கியத்துவம் பெற்றிருக்கிறது. 
 
இந்தக் கோயிலின் கட்டிட அமைப்பு, சித்திரை பத்தாம் நாள் கதிரவன் உதிக்கும் நேரம்; சிவலிங்கத்தின் நெற்றிப்பகுதியில் நேராக கதிரவனுடைய ஒளி விழுமாறு அமைக்கப்பட்டிருக்கிறது. மற்ற நாட்களில் அது நேராக விழுவதில்லை. சுவர்களின் அமைப்பும், வாயிலும் அவ்வாறு கட்டப்பட்டிருக்கின்றன. அன்றைய நாட்களில் கோயில்களே நிர்வாக அறிவிப்புகளைச் செய்யும் இடமாக இருந்தன போலும்.
 
வேளாண்மை அறிவுசார்ந்த தொழில். அதில் காலம் குறித்த கணக்குகள் மிகத்தேவையானவை. அதை அறிந்து பயன்படுத்துவது தனித் திறமை. அதிலும் அத்திறனைப் பொதுப் பயன்பாட்டிற்குக் கொண்டுவந்து காலகாலத்துக்கும் நிற்கச் செய்தல் மிகப்பெரிய வேலை. அப்படியான வேலையைச் செய்த பாண்டியன் செழியன் சேந்தனுக்கும், அவரைத் தொடர்ந்து திருப்பணிகள் செய்த மன்னருக்கும் நம் வணக்கங்களைச் செலுத்துவோம்.
 
சொற்பொருள்:

பத்து             - எண், வயல்
செத்தலை  - உழவுக் கணக்கு
வித்தகம்     - அறிவு
சித்துரு        - அறிவு வடிவமான கடவுள்
நெத்தி          - நெற்றி
புத்தொளி    - கதிரவன் ஒளி
பித்திகை     - சுவர்
வத்தனை   - ஆக்கம், வளமை
 
 
பாடல்: இன்னிசை வெண்பா

சித்திரைப் பத்தினில் பத்தினில் வித்திடும்/
செத்தலை வித்தகம் சித்துரு நெத்தியில்/
புத்தொளி முத்திரை வைத்திடும் பித்திகை/
வத்தனை மொத்தமும் காண்./
 
========================
திருச்சிராப்பள்ளி ப.மாதேவன்
09-01-2022
========================
 


திருமுன் தமிழ் - தாழைப்பத்து 1

 


தஞ்சைப் பெருவுடையார் குடமுழுக்கு 05-02-2020ல் நடந்ததை ஒட்டி; அது தமிழில் நடைபெற்றதன் அடையாளமாகவும், தமிழில் நடைபெறவேண்டிய காரணம் குறித்தும் பத்து வெண்பாக்களை அப்பொழுது எழுதினேன். 
 
பொதுத் தலைப்பாகத் "திருமுன் தமிழ்" என்னும் பெயர் தாங்க, பெருவுடையார் கோயிலில் ஒருநாள் காலைப் பொழுது நடவடிக்கைகளும், ஆடல் நடைபெறுவதும், மக்கள் தொழுதலும், பெருவுடையாருக்கு அமுது படைத்தலும் "தஞ்சைப்பத்து" எனும் பெயரில் வெண்பாக்களாக இயற்றப்பட்டன.
 
தொடர்ந்து; நான்பிறந்த ஊரின் கோயில் குறித்து பத்துப்பாக்கள் எழுதுகிறேன். தொடர்ந்து வெவ்வேறு ஊர்களின் கோயில்களைக் குறித்தும்"பத்து"ப் பாக்களாகப் பதிவிட விழைகிறேன். பாடல்கள் வரலாற்றை முதன்மைப் படுத்துவதாகவே அமையும்.
 
தமிழின் செழுமையே அதன் பாடல் முறைதான். அதனாலேயே இவற்றை வெண்பாக்களாக எழுத முனைகிறேன். அதற்கான விளக்கத்தையும் பாடலுடன் இணைத்துப் பதிவிடுகிறேன். விளக்கம், சொற்பொருள், பாடல் என்ற வரிசையில் அமையும். 
 
இறைவனைத் தமிழில் பாடுவீர்.
 
அன்புடன்,
திருச்சிராப்பள்ளி ப.மாதேவன்,
 
சென்னை.
08-01-2022
 
. ======================
. திருமுன் தமிழ் - தாழைப்பத்து
. ======================
 
பாடல் : 1 விளக்கம்

தெற்கே குமரிப்பகுதியில் இருக்கிறது தாடகை(தடாதகை) மலை, புவியில் காணப்பெறும் பழமலைகளில் ஒன்று. கரும்பாறையால் ஆன தேறிய, திண்ணம் மிகு மலை. அதை ஒட்டி வளையவரும் பழையாற்றால் வேளாண்மை சிறக்க, வளங்கொழித்துச் சிறந்த தாழக்குடிப் பேரூர். அந்த மண்ணிலே சேந்தன் செழியன் எனும் பாண்டியமன்னனால், சிவனுக்கு எடுப்பிக்கப்பட்டக் கற்றளி இது. நுண்ணிய வேலைப்படுகள் அமைந்த கோயில். 
 
சொற்பொருள்

தேறுகொள் - திண்மை மிகுந்த
பன்னி - நெருங்கி
தண்ணாறு - குளிர்ந்த ஆறு
மாறுகால் - இயல்புக் கூத்தின் கால்வகை
 
பாடல்: இன்னிசை வெண்பா

தென்குமரி வன்மலை தேறுகொள் தாடகை/
பன்னிவருந் தண்ணாற்றுப் பேறுவளர்த் தாழைநகர்/
மண்ணிலே சேந்தனவன் மாறுகா லீசர்க்கு/
பண்ணிய நுண்கோயில் பார்/
 
======================
திருச்சிராப்பள்ளி ப.மாதேவன்
08-01-2022
======================

Thursday, 6 January 2022

ஏ.ஆர்.இரகுமான் பிறந்தநாள் 2022




தமிழ்த் திரை இசைவானின்
மூன்றாம் கதிரவன்.

என் வீட்டுத்தோட்டத்தின்
பூக்களுக்காய் ஒலித்த
புதிய புல்லாங்குழல்..

சாளரக் கம்பிகளில்
சிறகால் தட்டி இசைத்த
பட்டாம்பூச்சி.

ஓசைகளை அடுக்கி உயர்ந்து
விருதுகளை வீழ்த்திய
மண்ணின் கலைஞன்.

கருணாமிருத சாகரத்தின்
பண்ணுயர்வை
உலகம் அறிய
ஒலிக்கத்துடிக்கும் இசையே
வாழி ! நீ வாழி! வாழி!!

========================
திருச்சிராப்பள்ளி ப.மாதேவன்
06-01-2022
========================