உங்கள் வண்ணங்களால்
என்னை நிறைக்க முயலாதீர்கள்.
நான் மிகக் கருமையானவன்,
எல்லா வண்ணங்களையும்
விழுங்கிவிடுகிறேன்.
உங்கள் கட்சி வலைவீசி
என்னைப் பிடிக்க முயலாதீர்கள்.
நான் மிகச் சிறியவன்,
வலையின் இடுக்குகளின் வழியே
வெளியேறிவிடுகிறேன்.
உங்கள் கொடிமரங்களுக்கு
என்னைக் கும்பிடுபோட வைக்காதீர்கள்.
நான் சிறு புல்,
என் இதழசையும் காற்றில்
கொடி பறக்கப்போவதில்லை.
உங்கள் பாடல்களை
என்முன்னே இசைக்க முயலாதீர்கள்.
மிகச்சிறிய செவிகள் எனக்கு,
இரைச்சலை ஏழிசையாய்ப் பிரித்தறிய
அவற்றால் இயலாது.
நீங்கள் விரும்பும் மலர்களை
எனக்குச் சூட்ட முயலாதீர்கள்.
கடுகினும் சிறியது என் நாசி,
அதன் ஓட்டைகள் எங்கும்
ஏற்கனவே நிரம்பி வழிகிறது
எம் குருதியின் நாற்றம்.
இறுதியாய் ஒன்று,
உங்கள் முகமூடிகளை
என்முகத்தில் அணிவிக்க முயலாதீர்கள்.
சிறிதெனினும்
என் நகங்கள் வலிமையானவை.
சிராப்பள்ளி ப.மாதேவன்,
19-02-2019
No comments:
Post a Comment
தங்கள் கருத்துகளைப் பதிவிடுங்கள்