கல்லணை நிறைக்கும்
காவிரிதன்
கரைகள் ஏதென்றால்,
காட்டுதல் எளிதே.
நடுநீர் எதுவென வினவின்;
அத்தனை எளிதா
செப்பம் பகர்ந்திட?
அலைகள் தாலாட்டும்
ஆழியின்
இக்கரை அக்கரை
இயம்புதல் எளிதே.
நடுக்கடல் எதுவென வினவின்;
அத்தனை எளிதா
செப்பம் பகர்ந்திட?
வானில் கதிரவனைக்
காணும் வழியின்
தென்கரை வடகரை;
தன்நிழல் கொண்டே
எண்ணுதல் எளிதே.
நடுவழி எதுவென வினவின்;
அத்தனை எளிதா
செப்பம் பகர்ந்திட?
தென்முதல் தொடங்குதல்
தண்டமிழ் மரபே.
தென்னவன் மீன்குறி
தன்பெயர்ச் சூடிய
சுறவத் திங்களே
மன்னர்க்குத் தொடக்கம்.
முழவு கறங்க
முகிழ்த்தது புத்தாண்டு.
பொங்கல் பொங்கிட
பொலி சிறந்திட
ஏறுகள் களித்திட
யானைகள் மகிழ்ந்திட
கன்னல் தமிழெடுத்து
வையம் வாழி! வாழி!! என
வாழ்த்துவமே.
No comments:
Post a Comment
தங்கள் கருத்துகளைப் பதிவிடுங்கள்